يمّه عليه إن زعل ... وإذا رضى يمّه
يمّه ذبحني غـلاه ... وشلّ وجداني
يمّه غرامه طريقي ... ولازم اتمّه
شيٍ من الله على غفلة تغَّشَاني ...!!
اشهق على ضحكته وأشفق على ضمّه
وأموت منه إن جفى ... وإن جاني أحياني
إن كان درب الشقى يمر من يمّه ...!!
والله لكمّل شقاه " إن الله أحياني "
أقول يا سيدي ... ويقول يا عمّة ...!
كلٍ ذبحه الوله في عشقة الثاني
اشتاق طعم الغدير اللي وسط فمّه
مقدر اخبّي عليه ... اكتب ويقراني
قمت اشتكي للـغلا ... واصيح واخمّه
ياشين بلوى الهوى ... الله لا يبلا ني
يقول لي بالهوى مذهب ولي ذمّة
واقول بصرك ... ولكن لا تعداني
أبي طريقك يصير لوجهتي يِمَّة
ومنين يممت وجهك غصب تلقاني
يزمني بالهوى ... زمّة ورى زمّة
قطّع وريده وخاطه وسط شرياني
مبطي إذا خفت صحت وقلت " يايمّه "
والحين إذا خفت صحت وقلت " ياحصاني "
لا واهني من قرب منه ... ومن شمّه
ماكن ربي خلقه إلا على شاني ...!!
جيته وكلي من الأشواق ملتمّة
امشي من الصبح لين ان عشقه أمساني
ياحلو لوعة شقاه ... ويا حلو سمّه
والله ياهو بالهوى " من جد وراني "
أدمى عيوني ... وحنا يديني بدمّه
وعلى طريق الوله اقفى وخلاني
يمّه أحبه ... فديت أبوه قبل أمه ...!
يهزني هز ريح ... و زلزل أركاني
وش فيه إذا البنت تعشق...؟! .. الهوى قمّة
خليني اعشق قبل ما تابس أغصاني
يهمني حيــل ... وادري فيني اهمّه
حتى اسألي روجي الوردي ... وفستاني
الجمعة يونيو 13, 2008 10:45 pm
